Morgunblaðið kvatt

Ég er alin upp á heimili þar sem Mogginn var keyptur og að loknu stúdentsprófi var ég blaðamaður á Morgunblaðinu um skeið. Leiðir okkar Moggans hafa því lengi legið saman. Undanfarin ár hef ég ekki verið áskrifandi að blaðinu, þó að ég hafi verið með helgaráskrift til skamms tíma.

Morgunblaðið hefur vissulega verið pólitískt málgagn og ég lét einmitt helgaráskriftina fjúka í aðdraganda kosninga, þegar áróðurinn var orðinn einum of yfirþyrmandi. En þrátt fyrir allt hefur verið ákveðinn metnaður í fréttaskrifum á blaðinu og mikill kraftur hefur verið lagður í uppbyggingu á vefnum mbl.is.

Því miður virðast nýir eigendur ætla að fara aðra leið með Morgunblaðið. Kvótakóngarnir sem keyptu Moggann hafa nú sagt upp blaðamanni ársins, ásamt fjölda annarra vandaðra blaðamanna og fjölmiðlafólks. Í staðinn hafa þeir ráðið aflóga pólitíkus í ritstjórastólinn, manninn sem af mörgum er talinn bera einna mesta ábyrgð á íslenskra hruninu.

Ég get ekki sagt upp áskrift að Morgunblaðinu aftur, en ég get sniðgengið mbl.is og hvet aðra til að gera það sama. Því ætla ég að loka þessu bloggi. Ég verð áfram með blogg á blogspot og síðu á Facebook, en mbl.is verður ekki lengur daglegur viðkomustaður í ferðum mínum á netinu.

Davíð og Haraldur ritstjórar

Athugasemdir

[Grefillinn Sjálfur - Koma svo! (IP-tala skráð) 24.9.2009 kl. 20:36]

Bless, bless.

[Svanur Sigurbjörnsson, 25.9.2009 kl. 00:32]

Skiljanlega Svala.  Ég hef gert hið sama nú. 

[Anna Benkovic Mikaelsdóttir, 25.9.2009 kl. 04:36]

BESTU BLOGARAR MBL.IS ERU AÐ HÆTTA HVERJIR AF ÖÐRUM...ÁN ÞESS AÐ MÆLAST UM ÞAÐ FYRIRFRAM!